இந்திய வல்லாதிக்க அரசின் நயவஞ்சகமான முகத்திரையைக் கிழித்து, கோரமுகத்தினை உலகிற்கு அம்பலப்படுத்திய, அகிம்சையின் நாயகன் லெப்.கேணல். திலீபனின் முப்பத்தொன்பதாம் ஆண்டு நினைவேந்தலோடு, தமிழீழ வான்படையின் சிறப்புத் தளபதி. மாவீரர் கேணல். சங்கர்/முகிலன் அவர்களின் இருபத்தைந்தாம் ஆண்டு நினைவேந்தலுமாக, இரண்டு மாவீரர்களதும் வணக்க நிகழ்வானது, யேர்மனியின் மத்திய மாநிலத்தின், டோட்மூண்ட் நகரிலே மிகவும் உணர்வுபூர்வமாக முன்னெடுக்கப் பெற்றது.
26.09.2026 சனிக்கிழமை மாலை 17.30 மணிக்கு ஆரம்பமான இந்நிகழ்விலே, பொதுச்சுடரினை, தமிழர் ஒருங்கிணைப்புக்குழுவின், மத்திய மாநிலம் இரண்டின் துணைப் பொறுப்பாளர் பொன்னையா கிருபாமூர்த்தி ஏற்றிவைக்க, தமிழீழத் தேசியக் கொடியினை தமிழர் ஒருங்கிணைப்புக்குழுவின், வடமத்தி இரண்டின் பொறுப்பாளர். ஜெயலவதாஸ் ஏற்றிவைத்தார்.
தொடர்ந்து, திருவுருவப் படங்களுக்கான ஈகைச்சுடர் ஏற்றி வைக்கப்பெற்று, மலர்மாலைகளும் அணிவிக்கப்பெற்றதுடன், மக்களனைவரும் மலர், சுடர் வணக்கம் செலுத்தி, அகவணக்கமும் செய்தனர்.
மாவீர நடனங்கள், கவிதைகள்,இசை வணக்கம் என்பன மிகவும் உணர்வுபூர்வமாக முன்னெடுக்கப்பெற்று, சிறப்புரையும் இடம்பெற்றது.
பெருமளவான மக்கள், செயற்பாட்டாளர்கள், கலைஞர்களென அணியமாகிய இந்நிகழ்வானது, தேசியக்கொடி கையேற்று, “நம்புங்கள் தமிழீழம் நாளை பிறக்கும்..” என்ற உறுதியேற்போடு நிறைவுற்றது.
1 thought on “யேர்மனி டோட்மூண்ட் நகரிலே உணர்வுபூர்வமாக இடம்பெற்ற மாவீரர் வணக்க நிகழ்வு”
Comments are closed.